Монгол хүний мөн чанар, үндэснийхээ өв соёл, уламжлал, зан заншилтай танилцуулах, эх оронч хүмүүжлийг олгох зорилгоор “Хүүхэд залуучуудад эх оронч үзэл төлөвшүүлэх үндэсний хөтөлбөр”-ийг Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлөөс санаачлан Зэвсэгт хүчний жанжин штаб, БЗД-ийн харьяа "Хөдөлмөр" зуслантай хамтран хэрэгжүүлж байна.

Энэ хүрээнд Нийслэлийн ерөнхий боловсролын сургуулиудын 9-10 дугаар ангийн сурагчдын дунд “Эх оронч сурагч” хөтөлбөрийг амжилттай хэрэгжүүлж, тус хөтөлбөр 7 дүүргийн 46 сурагч хамрагдлаа. Тус хөтөлбөрт хамрагдсан сурагчид өчигдөр Зэвсэгт хүчний 032-р ангид ёслолын жагсаалд оролцон энэ удаагийн хөтөлбөрөө өндөрүүллээ. Энэ үеэр НИТХ-ын дарга А.Баяр "Хөтөлбөрт хамрагдсан нийт сурагчдадаа баярлалаа. Та бүхэн хэсэгхэн хугацаанд ч гэсэн эх орныхоо үнэт зүйл, байгалийн сайхан, хувь хүний хариуцлага, найз нөхдийн халуун дулаан уур амьсгал гээд чамгүй олон зүйлийг мэдэрч, ойлгож авсан гэдэгт итгэлтэй байна. Хөтөлбөрөөс сурсан зүйлээ цаашдын амьдралдаа хэвшил, дадал болгож яваарай" хэмээн онцлон хэллээ.

Сурагчид 7 хоногийн турш “Хөдөлмөр” зусланд байрлаж олон төрлийн сургалт, сонирхолтой тоглоомуудаар дамжуулан эх оронч үзэл, үндэсний бахархал, нүүдэлчин ёс заншил, түүхийн талаар мэдлэгээ нэмэгдүүлж, өглөө бүрийг Төрийн дууллаа дуулж, жагсаалын бэлтгэл хийх, багаараа олон сонирхолтой сургалтад хамрагдсандаа сэтгэл хангалуун байгаагаа илэрхийллээ.